ನನ್ನ ಅಮ್ಮನೇ..

ಅಮ್ಮ ನಿನ್ನ ಕನಸನೊಂದ 

ನನಸು ಮಾಡೋ

ಆಸೆ ನನಗೆ

ಬೆಟ್ಟದಷ್ಟು ಪ್ರೀತಿ ಕೊಟ್ಟು

ಎತ್ತಿ ನಗಿಸಿ 

ತುತ್ತು ಕೊಟ್ಟೆ

ಅಳುವ ಮೊಗಕೆ ಮುತ್ತು ಕೊಟ್ಟು

ಬೆಳೆಸಿ ಜೀವ ಮಮತೆ ಇಟ್ಟೆ.

ನಿನ್ನ ಬದುಕ ಬತ್ತಿ ಮಾಡಿ

ನನ್ನ ಬದುಕು ಬೆಳಗಲೆಂದು

ಕಷ್ಟ ಕೋಟಿ

ಛಲದಿ ತಡೆದೆ 

ನನ್ನ ದೈವವೇ ..

ನಿನ್ನ ಆಸೆ ಮರೆತು ಹಾಡಿ

ಕನಸು ಗುರಿಯ 

ಹಸನು ಮಾಡಲೆಂದು

ದುಡಿದೆ ಮನಸು ಮಾಡಿ

ನನ್ನ ಅಮ್ಮನೇ..

ಜಾರುತಿದೆ ಮನಸು

ಜಾರಿಹೋಗಿದೆ ಮನಸು
ಅನಿಸಿದೆ...
ಜಾದೂವಾಗಿದೆ ನನಗೆ.
ಮೋಡಿ ಮಾಡಿದೆ ಮಳೆಯು
ಮಂದಗಾಳಿಯ ಕಳಿಸಿ.
ಬಿಡದೆ ಕಾದಿದೆ ನೆನಪು
ಕಾರಣಿಲ್ಲದ ಹುರುಪು!!!.

ಒಂಟಿ ಬಾಳಿಗೆ ನೀನು
ಅಂಟಿ ಬರುವೆನು ಎಂದೆ.,
ಗಂಟು ಹಾಕಿದ ಮೇಲೆ
ನಂಟು ಬೆಸೆಯುವುದಂತೆ..
ಮುಗ್ದ ಜೀವಕೆ ನೀನು
ಬೆಟ್ಟದಾಸರೆಯಂತೆ..
ನಿನ್ನ ಕಷ್ಟದೊಳೆಲ್ಲ
ನನಗೂ ಪಾಲಿದೆಯಂತೆ..
ಪ್ರೀತಿ ಕಡಲಿಗೆ ನೀನು
ಭದ್ರ ಸೇತುವೆಯಂತೆ..
ಮನದ ಮುಗಿಲಲಿ ನೀನು
ನಗುವ ನೇಸರನಂತೆ ...

ಚಿಗುರೊ ಬಳ್ಳಿಲಿ
ಹೊಸದು ಮೊಗ್ಗಾದ ಹಾಗೆ,
ತಾಯ ಹೆಸರ ಕೇಳಿ
ಮಗು ಕರೆದ ಹಾಗೆ,
ಮಳೆಯ ಮೋಡವ ಕಂಡು
ನವಿಲು ಕುಣಿಯುವ ಹಾಗೆ,
ನೀರಿಲ್ಲದೆ ಮೀನು
ಚಡಪಡಿಸುವಾ ಹಾಗೆ,
ನಿನ್ನ ಒಲವಿಗೆ ಹೃದಯ
ಮಿಡಿಯುವುದು ಹೀಗೆ...!!!

ಸಾಗುತಿದೆ...

ಗುರಿ ಇಲ್ಲದ ಬದುಕು
ಬಯಸುವ ಮನ
ನಿಲುಕದ ಕನಸು***
ನೆನಪುಗಳ ತಡಕಾಟ
ಭಾವನೆಗಳ ಹೊಯ್ದಾಟ!
ಮುಗಿಯದ ದಾರಿ!!
ಭರವಸೆಯ ಬೆನ್ನಟ್ಟಿ ಸಾಗುತಿದೆ..


ದಾರಿಗಳು ಹಲವಾರು
ತವಕಗಳು ನೂರಾರು
ಮನದಲ್ಲಿ ದುಗುಡ!

ಕಣ್ಣಮುಚ್ಚಿ ಸಾಗುತಿದೆ,
ನೆಲೆ ಇಲ್ಲದ ಜೀವನ...

ಹಲವಾರು ಚಿಂತೆಗಳು

ಮುಗಿಯದದರ ಕಂತುಗಳು!

ನಡುಸುಳಿವ ಕವಲುಗಳು.!!

ದಿಕ್ಕೆಟ್ಟ ನಾವೆ,

ಎತ್ತಲೋ ಪಯಣ,

ಹುಚ್ಚೆದ್ದು ಸಾಗುತಿದೆ...

ಪ್ರೀತಿ

ಮುಗುದೆಯೊಳಗಣ ಕುಸುಮದಂತೆ 

ನನ್ನೊಡಲ ಪ್ರೀತಿ 

ಹಿಗ್ಗಿ ಬಿರಿಯಲು ತವಕ.!!

ಕಟ್ಟೊಡೆದ ಕಡಲಂತೆ 

ನನ್ನ ಹೆಮ್ಮೆಯ ಪ್ರೀತಿ

ಜಾರಿ ಸಾಗುವ ತವಕ..!!

ತೇಲಿ ಓಡುವ ಮೋಡದ ತೆರದಿ

ನನ್ನಾಸೆಯ ಪ್ರೀತಿ

ಕರಗಿ ಹನಿಯಾಗುವ ತವಕ!!

ಮಲೆನಾಡ ಮಳೆಯಂತೆ

ಈ ಜೀವದ ಪ್ರೀತಿ

ತವಕದಲಿ ಮಿಡಿಯುತಿದೆ 

ಕಟ್ಟಿಕೊಳ್ಳಲು ಬದುಕ..

Photo credit goes to ಛಾಯಾ ಚಿತ್ತಾರಾ by Prakasha Hegde

ಹಂಬಲ

ಇಳಿಸಂಜೆ ಕಳೆವಾಗ

ಮಳೆಯಲ್ಲಿ ನೆನೆದಾಗ

ನೀ ದೂರ ಇರುವಾಗ

ಹೇಗೆ ಕಳೆಯಲಿ ಸಮಯ.. 

ನಿನ ನೆನಪು ಬಂದಾಗ ?

ಕಲ್ಪನೆಯ ಕಾವ್ಯಗಳು

ಮನತುಂಬಿ ನಿಂತಾಗ

ನವಭಾವ ತುಂಬಿತುಂಬಿ..

ಮನಹಾಡಿದಾಗ..

ಈ ಜೀವ ನಿನ ಸನಿಹ 

ಹಂಬಲಿಸಿದಾಗ..

ಹೇಗೆ ಸಹಿಸಲಿ ವಿರಹ

ನೀನಿಲ್ಲದಾಗ ???

ನೆನಪಲ್ಲಿ ನನ್ನ ಹೃದಯ 

ಬಿಕ್ಕಳಿಸಿದಾಗ

ಬರುವೆನೆಂದರು ಬರದೆ 

ನೀ ಕಾಡಿದಾಗ..
ನೀ ಕೊಟ್ಟ ನವಿಲುಗರಿ
ಮರಿ ಹಾಕಿದಾಗ
ಹೇಗೆ ತೋರಲಿ ಗೆಳೆಯ
ನೀನಿಲ್ಲದಾಗ... 

ನೀನು..

ಮನದಲ್ಲಿ ಮೊಳೆತ 

ಮಧುರ ಮಲ್ಲಿಗೆ ನೀನು..

ಭಾವದಲಿ ಬೆರೆತ 

ಬಾನಾಡಿ ನೀನು...

ಕನಸಲ್ಲಿ ಕರೆದ 

ಕನವರಿಕೆ ನೀನು..

ಮಧುವಲ್ಲಿ ಬೆರೆತ 

ಮಕರಂಧ ನೀನು..

ಬೆಳಕಲ್ಲಿ ಬೆರೆತ 

ಬೆಳದಿಂಗಳು ನೀನು..

ಪುಸ್ತಕದಲ್ಲಿರುವ 

ಮುಖಪುಟವೆ  ನೀನು.. 

ಕವಿಗಳಲ್ಲಿಯೇ ಶ್ರೇಷ್ಟ 

ಕವಿಪುಂಗವ ನೀನು..

ನನ್ನಲ್ಲಿ ಕಲೆತ 

ನನ್ನಾಸೆ ನೀನು..

ನನ್ನ ಹೃದಯವ ಕದ್ದ

ನನ್ನೊಡೆಯ ನೀನು..

ಅಂತರಂಗದಲ್ಲಿರುವ 

ಅಂತರಾತ್ಮವೇ ನೀನು..

ಕಷ್ಟ

ಬದುಕುವುದು ಕಷ್ಟ ಬರಗಾಲದಲ್ಲಿ
ನಡೆಯುವುದು ಕಷ್ಟ ಬರಿಗಾಲಿನಲ್ಲಿ
ಬಯಸಿದರೆ ಕಷ್ಟ ಬದಲಾಗದಲ್ಲಿ
ಬರೆಯುದು ಕಷ್ಟ ಬಹುಭಾಷೆಯಲ್ಲಿ

ಅಡಗುವುದು ಕಷ್ಟ ನಡುಬೀದಿಯಲ್ಲಿ
ಅಲೆಯುವುದು ಕಷ್ಟ ಪರನಾಡಿನಲ್ಲಿ
ಮರೆಯುವುದು ಕಷ್ಟ ಮನದಾಳದಲ್ಲಿ
ಕರೆಯುವುದು ಕಷ್ಟ ಜನಜಾತ್ರೆಯಲ್ಲಿ